بحبك زى ما تكونى ..... وبعشق كل شىء فيكى
وصورتك ساكنه فعيونى ..... وعمرى بشوفه فعنيكى
وحالف طول حياة روحى .... ما أحن لحد غير ليكـى
بحبك زى ما تكونى ...... وبضعف وانتى مش جنبى
بحس بشوقى وجنونى ...... فى يوم ما تغيبى عن قلبـى
يقولوا البعد بينسى ...... وفبعادك يزيد حـــــبـــى
بحبك زى ما تكونى ....... يا قمرى وليلى ونهارى
يا أقرب من وريد فيا ........ وأقرب ليـــــا من دارى
يا أجمل حد حبيته ........ وأحلى ملاك ف مشوارى
بحبك زى ما تكونى ......... يا أقرب ليا من نفسى
يا صوتى ونبضى وسكونى ...... يا أقرب من حنين همسى
ومن غيرك بتوه واضعف ....... ويبعد عنى نور شمسى
بحبك زى ما تكونى ....... حزينه .. جريحه .. مغلوبه
يا عمرى وفرحى وظنونى ..... يابسمه ف قلبى مكتوبه
وساعة بعيشها من غيرك ...... ما هيش فى العمر محسوبه
بحبك زى ما تكونى ....... رقيقه .. بريئه .. مظلومه
بحبك حتى لو كنتى ....... شريده .. عنيده .. مهمومه
بحبك ذكرى فى الماضى ....... وفرحة ف بكره مرسومه
كتبها اسلام ماهر في 03:31 صباحاً ::
كلام جميل وإحساس جميل من حد جميل بيكتب اللى حسه واللى جواه اشكراً على الكلام اللى أمتعتنا بيه
الزجل ده بجد بحبه جدا
الكلمات رومانسية جدا والاحساس عالي فيها اوي
بجد يا إسلام تسلم ايدك
ودايما تمتعنا بكلامك الجميل
اخى فكرى اشكرك على مجاملتك الرقيقة
كلماتك جميلة بجد يا اخى
روشا الجميلة هنا
يا بختى بزيارتك
بجد زيارتك اسعدتنى جدا وشكرا لكلامك ومجاملتك
احلى ما فيها احساسها
"لو غبت تغيب شمسى "
المهم انها فعلا اثرت في لأنى في هذه اللحظة التى اكتب فيها مغترب عن اهلى
الشاعر الجميل إسلام ، بعيدا عن كلام المجاملات المعتاد بين الصحاب. أأكد أنك صاحب موهبة شعرية صحيحة. وهذا واضح من سلامة الأوزان. ورجائي لك ألا يكون طموحك مجرد كتابة " أغاني شبابية" . فأنت لديك خميرة صالحة لأن تكون شاعر عامية حقيقي .
وهذا يكون بقراءة شعر أساتذتنا العظام : بيرم التونسي ، بديع خيري،فؤاد حداد،صلاح جاهين،الأبنودي،أحمدفؤاد نجم،مجدي نجيب، نجيب سرور .... وصولا إلى جمال بخيت. لتتكون لديك زخيرة من اللغة والصور والقوالب التي تعينك على الوصول لأي معنى بسهولة وسلاسة. ثم تتكون لديك لغتك الخاصة. و حاول الإنضمام إلى نادٍ أدبي بحيكم ، فتستفيد من خبرات الأعضاء من شعراء و نقاد. فيكون للك أصدقاء منتمين إلى هوايتك فيدفع كل منكم صاحبه إلى الأحسن.
مادفعني للكتابة إليك، هو مرورك الكريم على مدونتي(في اليوم الأول لنشرها) فلما زرت مدونتك قرأتها بالكامل لأتأكد أن بداخلك شاعر حقيقي ، أخشى أن تفقده أو أن تحبسه في موضوع الحب و الهجر و العتاب ... إلخ . وهذا حالنا في البدايات ... لكن هل تعرف يا إسلام ماهو الفرق بين الشاعر و الشخص العادي؟ الشاعر يرى مالايرا العاديون. وحتى لو رأوا مثله فهو قادر على أن يصيغ ذلك بشكل مختلف يدهش من رأى ومن لم يرى. يعني ربنا أعطاك موهبة خاصة (مش مرمية على الأرصفة لكل من هب و دب) نشكر الله على عطاياه بثقلها و تنميتها و الحفاظ عليها.
أنا أكتب الشعر و القصة منذ ما يزيد عن ربع قرن. لكني خارج مصر منذ عشرين سنة. موزعة بين بلاد الله . إلى أن استقريت مهاجراً بكندا. العرب الكنديين يعرفونني أكثر مما أنا معروف بمصر (لي ديوان واحد بمصر)
أرجو أن تشرف مدونتي بقراءة متأنية و أهديك http://www.maktoobblog.com/show_multi.php?file=http://www.maktoobblog.com/userFiles/a/b/abuzahda/multimedia/568woshoosh.mp3
لك و لأصدقاءك
سيد أبو زهده
كل عام وأنتم بخير: بمناسبة الإسراء والمعراج
كل عام وأنتم بخير: بمناسبة إقتراب شهر شعبان
كل عام وأنتم بخير:اللهم أحمي أولي القبلتين وثاني الحرمين ومسري سيدنا محمد صلي الله عليه وسلم
كل عام وأنتم بخير:اللهم بارك لنا في شعبان وبلغنا رمضان
كل عام وأنتم بخير:والأمة العربية والإسلامية بكل خير ....
كل عام وأنتم بخير: ويارب نري الخير في بلادنا وحكامنا ..!!